Garant bank xodimlari TDIU talabalari uchun kiberxavfsizlik bo‘yicha ma’ruza o‘tkazdilar

Garant bank va Toshkent davlat iqtisodiyot universiteti o‘rtasida tashkil etilgan kafedra doirasida, “Bank hisobi va audit” yo‘nalishida tahsil olayotgan talabalar uchun “Ijtimoiy tarmoqlarda kiberxavfsizlik” mavzusida bankda ma’ruza tashkil etildi.

Uchrashuv davomida moliyaviy texnologiyalar sohasidagi dolzarb tahdidlar, jumladan fishing, firibgarlik sxemalari hamda ijtimoiy muhandislik usullari muhokama qilindi. Shuningdek, bugungi kunda hujumlarning katta qismi TikTok va Telegram kabi ijtimoiy tarmoqlar hamda messenjerlar orqali amalga oshirilayotgani, firibgarlar esa foydalanuvchilarning ishonchidan faol foydalanayotgani alohida ta’kidlandi.

Bank xodimlari real misollar asosida keng tarqalgan firibgarlik holatlarini ko‘rsatib berdilar hamda shaxsiy akkauntlarning buzilishi, ma’lumotlar sizib chiqishi va bank xizmatlariga ruxsatsiz kirish holatlarining oldini olish bo‘yicha amaliy tavsiyalar berdilar. Internetda xavfsiz harakat qilish qoidalari, xususan, shaxsiy ma’lumotlarni himoya qilish, murakkab parollardan foydalanish va shubhali havolalar hamda xabarlarga nisbatan ehtiyotkorlik bilan yondashish masalalari batafsil tushuntirildi.

Talabalar nafaqat nazariy bilimlarga, balki kundalik hayotda raqamli xavfsizlik darajasini oshirishga yordam beradigan amaliy ko‘nikmalarga ham ega bo‘ldilar.

Bunday ma’ruzalar o‘tkazilishi Garant bankning yoshlar orasida moliyaviy va raqamli savodxonlikni oshirishga qaratilgan tizimli faoliyatining bir qismi hisoblanadi hamda zamonaviy texnologiyalardan mas’uliyatli foydalanish madaniyatini shakllantirishga xizmat qiladi.